About Mansang Maju

Reti Mansang

Semua kitai selalu bendar deka mansang dalam pengidup. Beduduk ari nya, kitai suah ngiga sereta macha berita pasal pemansang. Semua bansa di dunya tu selalu deka ngiga penemu ti ulih mai jalai  nuju pemansang. Mayuh chara tau dikena kitai nembuka ayat tu; “Reti leka jaku mansang….” Nitihka ditulis  ba dalam A Dictionary of Sea Dayak (Scott, 1956),  ba lambar 112: “Mansang: advance, progress, develop.”

Ketegal nadai genteran ayat ti chukup dikena nerangka reti leka jaku mansang, nya meh kitai nadai ngetu berandauka pasal pemansang. Runding enggau penemu pemansang makin hari makin dalam, makin maju, sereta nagih tinjau ti makin mayuh lebas, nya alai tinjau reti leka jaku pemansang pan nyau makin jauh nadai sempadan. Tebal agi reti pemansang ti dipejuraika ba blog tu iya nya ba pasal pemansang pengidup.  Pangka leka jaku pemansang besai bendar reti sereta enda ulih ditiuka kitai ngena chara ngelansa  tauka enggau ngerampas aja. Nya alai kitai mesti bejuraika reti iya enggau dalam. Pemansang tu mayuh bengkah iya nya; pemansang sekula, ekonomi, sosial, enggau politik. Keba, menua Malaysia pan bisi mega udah ngaga langgur pemansang - Vision 2020; ti alai Malaysia deka nyadi menua ti maju maya datai ba taun 2020 ila enti semua perambu ti udah diatur ulih dijapai.

Tuju mansangmaju.com

Portal enggau blog ti bisi udah digaga dulu ari tu bejuraika mayuh bengkah pemansang, tang mayuh agi ba pemansang politik menua kitai. Dulu ari tu mega udah bisi blog digaga aku empu pasal jaku peransang (Motivational Speaks) dikena aku empu bejalaika pengawa ba endur kereja. Enti kitai bejuraika penemu pemansang, endang sigi tuju ati kitai enggau orang dalam batang randau awakka tau bulih buah penemu ti manah ti tau mai kitai mansang maju. Nya meh tuju aku nengkebang mansangmaju.com (MM) tu.

Blog MM tu mai tuju ti bisi lain mimit ari blog enggau portal bukai iya nya ngemeratka pemansang sekula, kereja (career), ekonomi, sereta sosial. Blog tu berat agi ditulis ngena jaku Iban.  Iya ukai semina ngelaluka temuai ti asal tulin bansa Dayak Iban aja, tang semua orang ti landik sereta rindu bekenaka leka jaku Iban. Mayuh penemu pemansang dalam leka jaku bansa bukai tebal agi jaku English. Sebarang maya leka jaku Iban enda chukup ari segi genteran (vocabulary), leka jaku bukai deka diinjau kena ngenataika reti pekara dalam batang randau awakka engkeman sereta nenak dibacha. Bepun ari nya, arapka blog tu ulih nambahka jurai penemu pemansang ti tau mai pemujur dalam pengidup kitai semua.

Nuju sapa ti deka enggau berandau bejuraika penemu ba dalam blog tu, kita tau rejista nyadi raban ba ditu.

Blog mansangmaju.com tu dijaga:

Futurist (Paul Sliong) nyadi Ketuai Editor

Temenggung (Donny Joseph) nyadi Webmaster