Model Ekonomi Baru (Part 2)
Dikarang Ulih Futurist
Juluk Ati Model Ekonomi Baru (MEB)?
Kitai sama udah macha ba mayuh bengkah berita pasal Model Ekonomi Baru (MEB) tauka New Economic Model (NEM). Bisi 3 pekara kunchi juluk ati MEB ti dibantaika menteri besai lebuh iya ti bejadika aum besai Invest Malaysia 2010 ba Kuala Lumpur kena 30 Mar 2010 apin tentu lama ti udah.
3 Pekara Kunchi Ti Tau Mai Pengelantang Ngagai Pengidup Rayat Mayuh:
1) High Income - Polisi tauka dasar ekonomi ti dijangka deka ngemai penatai pemisi tikas tinggi ke semua rayat Malaysia. Nengah polisi tu MEB dijangkaka deka nambahka gaji perkapita rayat diatu dalam setaun ari US$7,000 (RM23,100) ke US$15,000 - US$20,000 (RM49,500 - RM66,000). (US$1 = RM3.3)
2) Inclusiveness - Polisi tauka dasar ekonomi ti dijangka deka nyungkakka pemansang ekonomi semua pupu raban bansa ba menua tu. Nitihka polisi tu, MEB dijangka tau meri peluang ngagai semua rayat sama-sama bela ampit bulih penyenang ari asil asal ba menua tu. Polisi tu semina ulih dijapai enti dipejalaika perintah enggau chara ti betul sereta enda bechiping (bepinang benibung).
3) Sustainability - Polisi tauka dasar ekonomi ti dijangka deka mai pemansang ekonomi ti enda puntan, diatu lalu datai ke dudi hari ila. Nengah polisi tu, MEB dijangka deka merambu pemansang ekonomi ti ukai semina ngulihka juluk ati dalam timpuh ti pandak aja tang mega berundingka nama penusah ti deka nyadi ba anembiak rebak dudi enti chara enggau atur polisi enda diaduka enggau betul.
Ulih Tauka Enda 3 Pekara Kunchi MEB Dijapai?
Aram kitai sama bela meratika enggau silik agi baka ni 3 pekara dalam MEB ulih dijapai. Nitihka penerang ripot MEB nya empu, 3 pekara kunchi di atas nya tadi dijangka deka dijapai seretai ti tau mai pemansang ngagai menua tu. Mayuh amat bansa tanya udah pansut ari orang politik ngarika parti perintah tauka penyakal lebuh sida ti bejurai ba parlimen.
Penatai Pemisi Tikas Tinggi (PPTT)
1) Mayuh polisi perintah ti lama sereta enda pengerah enggau orang dagang patut ditukar enggau jampat enti amat deka ngulihka PPTT.
2) Peluang bedagang kurang besekat enggau polisi ti semina nyaga pemaik sekeda pupu bansa aja patut dikurangka jampat. Enti pekara tu ulih diaduka enggau enda belampung ati, mayuh agi orang luar deka beranakka puku/mudal ba menua tu. Pemerani ngubah polisi ba pekara tu mai mayuh penguntung, laban mayuh agi peluang bekereja tau disediaka mayuh kompeni ba menua tu.
3) Penumbuh pemansang ekonomi purata 6.5% setaun ti diperambu deka dijapai perintah dalam timpuh taun 2011-2010 belabaka nadai penusah ekonomi ti enda manah baka ti udah nyadi baka dalam tengan taun 2008 suba! Dalam dunya ekonomi ti bendar perambu tu bisi enda tentu betul. Kabuah pia laban Malaysia udah lama nyadi raban dagang enggau mayuh bengkah menua ba dalam dunya nadai sempadan (globalization). Keba pakar ekonomi kala besemaka enggau jaku kenang ti munyi tu, “enti ekonomi menua Amerika Syarikat sakit chelap angat (engkasi), menua bukai tau kena pechik.”
Diatu menua China nyadi kaban dagang besai menua Malaysia. China dijangka nyadi injin penumbuh ekonomi dunya ti baru sama enggau India. Enti ekonomi dua menua tu bisi tabin, kati ku Malaysia tau enda kena tempias? Perambu penumbuh ekonomi patut digaga dalam dua tikas; iya nya: enti semua nitihka pelan 6.5% setaun, lalu enti bisi penusah ekonomi ti berat nyadi mesti ditulak 50% nyadi 3.25% setaun. Mayuh menua ti udah bulih PPTT nunjukka penumbuh pemansang ekonomi sida nadai kala tentu bangat tinggi tang semina ba taka 1-3% aja.
4) Belanja fiscal deficit (belanja lebih ari penatai pemisi) perintah ti udah datai ba taka 7.4% ari GDP (Penatai Pemisi Dalam Menua) dalam taun 2009 patut dikurangka ngambi jampat bulih fiscal surplus (belanja kurang ari penatai pemisi) enti deka bulih PPTT.
5) Enti kes makai suap agi balat nyadi ba menua tu, penusah fiscal deficit (belanja lebih ari penatai pemisi) perintah engka enda ulih teputar enggau jampat! Taja pan udah bisi atur perintah deka munaska penusah makai suap, tang chara bejalaika atur nya ti enda enggau bebendar ngasuh orang ti ngaga penyalah enda jera ketegal ukum enda berat. Tambah mega ukum dipejalaika diatu bepilih bulu. Hari-hari ba macham bengkah berita kitai bisi macha kes makai suap meruan enda nemu nurun tauka puntan!
6) penusah fiscal deficit (belanja lebih ari penatai pemisi) perintah mega lubah teputar enti menua ti kelalu mayuh meli barang ari luar. Polisi enggau atur patut dipejalaika ngambi mayuh bengkah barang ulih diasilka ba dalam menua tu empu. Beduduk ari nya impot tau kurang ari ekspot. Enda alah ga bansa pemakai ti kunchi ba pendiau pengidup rayat baka beras pan mesti dibeli ari menua luar? Kena April 2008 lebuh bejadika SCORE suba, perintah udah bedanji deka ngemansangka Sarawak nyadi “Jelapang Padi” menua Malaysia alai betanam padi paya bedandang besai chara komesil. Arapka danji nya enda tinggal nyadi seku aja. Ni penyauh pemujur pekara tu udah bejalai nadai tentu penerang ti silik udah dibantaika perintah Sarawak?
Polisi Ekonomi Nyengkaum Semua Raban Bansa.
1) Enti baka ti udah maya Dasar Ekonomi Baru (DEB) tauka New Economic Policy (NEP) suba, tusah bendar deka nerima kunchi ti kedua tu lalu pechaya 100% ambis ati. Pemerinsa ti udah diasai sereta dipansa tau bendar nyadika “pengajar” ngambi kitai beati-ati nempuh taun ti deka datai. Kabuah pia, DEB suba balat bendar bedanji deka ngemansang sereta nusun baru pendiau rayat merinsa mensena ba menua tu bekau lepas meredeka. Pengujung iya nama penyadi - nyau mai bansa penyakit baru dalam putar ekonomi - mayuh raban orang “idup di atas angin” tauka “rent-seeking” ba dalam kek ekonomi ti sigi udah ditemu enda besai. Dini enda chebik enggau tedai kuah iya aja ti datai ba orang ti beamat-amat begunaka bantu enggau tulung lebih agi ti kurang penatai pemisi diau ba menua pesisir. Diatu nyau rerauh ga bala sekeda kulu-kili bebaika papan tanda enggau kain rentang madahka 30% enda chukup tang 67%!
2) 40% ari semua isi rumah penatai pemisi ti tikas baruh lalu 77.2% ari sida tu ari raban bansa asal deka diberi bantu enggau tulung lebih agi ba Sarawak enggau Sabah. Penerang ti silik baka ni jalai perintah amat ulih nulung sida tu apin dibantaika bala sida Majlis Tindakan Ekonomi Negara (MTEN) tauka National Economic Advisory Council (NEAC). Naka ti diatu semua perambu tu agi baka buah - benung mengkal magang.
3) Peluang rayat enggau besemekih dalam mayuh bagi pemansang deka dibuka ngagai semua bansa kenu ku jaku. Ba senentang peluang tu, agi mayuh mega pekara tau dipejuraika enggau silik. Enti baka ti udah dipeda, ungkup bekereja ba perintah agi dikemeranka sekeda pupu bansa aja lalu enda nunjukka pengerami pemayuh semua raban bansa ti bisi nguan menua Malaysia tu.
Ba senentang nikika gaji tauka pangkat mega enda tentu nitihka pemanah enggau pengerajin kereja tang nyau nitihka sapa lebih pandai agi megai “kipas politik” jampat agi niki ke atas. Sekeda nya bisi mega nitihka chura kulit enggau pengarap ti dipegai tauka kaban semak aja. Semua pekara tu patut dipunaska enggau jampat! Enti nadai atur ti meruan dikena mutarka penusah tu, makin mayuh orang ti pandai-pandai ninggalka menua tu bekereja ngiga pengelantang ba menua maju.
Polisi Ekonomi Ti Enda Puntan
1) Enti nitihka perambu ba dalam ripot MEB bisi madah munyi tu - “semua pemansang deka diaduka pengudah berunding panjai ba penyauh pangka pemansang nya tadi ngagai mensia mayuh enggau rampa menua.” Enti baka ti udah tusah bendar mega deka pechaya nerima tu 100%. Mayuh ai sungai, menua sereta pengeraja asal ba menua tu nyau makin kusi. Pemakai menua nyau kurang laban mayuh kayu kampung dikereja kompeni kayu enggau enda betatak. Tekat ai Bakun empai tembu agi kalai-kalai lalu udah bisi pelan deka ngaga 12 igi agi tekat ai ti bukai ba Sarawak dikena ngulihka kuasa karan napi peminta ari pemansang industri ti makin betambah.
Baka ni pekara ti bansa tu tau nyungkakka pemansang ngagai mensia ti diau ba menua beserimbai enggau tekat ai tu ila agi nyadi tanda tanya. Baka ni ku jalai perintah deka ngulihka “Green GDP” ti bisi dipansa ba dalam ripot MEB nya tau ngasuh ati kitai rindu bendar bejuraika perambu ti bansa tu - munyi iya amat manah bendar didinga pending, tang pengamat iya sama meh kitai berati. Ba pelan pemansang SCORE bisi nyebut arang batu sebengkah ari bansa renewable energy! Iya ti kala ditemu kitai semina ari kuasa matahari, kuasa angin, kuasa ujan, kuasa ai pasang, enggau kuasa ai angat dalam puak bumi.
Comments
2 Responses to “Model Ekonomi Baru (Part 2)”
Leave a Reply
-
Provided by votectdirect.com .
Pengawa makai suap majak nyadi kemaya hari tu. Malaysia ari taun ke taun udah majak nurun tikas pengelurus nitihka sukat transparency international. Tu tau bendar meri empas negatif ngawa pengawa beranakka puku ba menua Malaysia.
Sida ti makai suap mit renchit aja kena tasat polis enggau komiti pengawa munaska penusah makai suap (SRPM/MACC). Tang sida ti makai suap nyengala bebesai selalu pandai bendar beselingkut ngelepaska diri laban udah chukup meri “lubricant” ngagai bagi orang ti sama enggau nyadi raban ngereja pengawa jai baka tu. Tu ti ngujungka mayuh fail orang besai selalu aja kena chelak “NFA = No Further Action!”
Ketegal nya makin mayuh orang jai ati nyau majak berani makai “beridup di atas angin” aja lalu enda ngarapka bekereja mansutka peluh sereta mansalka tulang ngulihka penatai pemisi. Penusah tu tau terus ngujungka belanja perintah besai terus ba zon defisit. Penusah tu meh ti benung nyadi ba menua Greece diatu! Anang kitai tau saru nyangka penusah nya enda ulih nyadi ba menua Malaysia enti menua tu enda meras munaska makai suap!