Teknik Landik Bejaku
Dikarang Ulih Futurist
Pemandai Bejaku Sereta Nemu Teknik Bejaku Enggau Lanchar Pekara ti Beguna Dalam Pengidup
Tiap kali kitai bejaku; kitai enggau chara enda sengaja nyual runding, servis, enggau barang ngagai orang bukai. Simpulka dalam jaku pandak, chara kitai ngenataika pekara ti dikejakuka kitai beguna amat dalam pengidup kitai sehari-hari enda ngira nuan bekereja kediri empu, bekereja makai gaji, bedagang, orang politik, sereta maya nuan berandau ruai.
Pengelandik Bejaku Deka Nentuka Pemujur Ba Dalam Mayuh Pekara/Pengawa
Uji kitai beratika enggau silik maya kitai bejalai meli barang ba pasar. Sekeda ari barang ti bisi ayan dijual nadai nya tentu bisi kualiti; tang nama meh kabuah mayuh orang ulih tekait ati meli barang nya taja pan maya sebedau nurun ari rumah nadai bisi ati deka meli? Dipelabaka aku semua kitai kala ngasaika kitai meli sekeda barang; tang maya udah pulai datai di rumah lalu nesal - “nama meh aku meli barang tu tadi ahhh..?” ku kitai mutap kediri. Udah datai di rumah baru nemu nesalka kitai ukai amat-amat deka begunaka barang nya.
Ukai Barang; Tang Pemandai Sereta Pengelandik Orang Bejual Bejaku
Saut iya senang aja - orang meli barang ti enda tentu bisi kualiti nya tadi ukai ketegal sida rindu tauka amat-amat beguna barang nya; tang meh pemutus sida ti ”meli” nya tadi bepanggai ba pemandai sereta pengelandik orang ti bejual barang nya bejaku narit ati enggau orang ti meli.
Kualiti Orang Ti Landik Bejaku:
1) Sida bisi pengelandik macha/meratika gaya orang ti enggau sida bejaku.
2) Sida bisi pengelandik bejurai/betawarka pemutus runding.
3) Sida arap/andal/pechaya enggau pengelandik ti di kemisi diri empu. Maya sida bejaku, sida bejaku enggau penuh pengerindu sereta penemu ba senentang pekara disebut sida. Sida bejaku penuh enggau jaku peransang (motivation).
4) Sida selalu besedia enggau semua saut bagi sebarang tanya ari orang mayuh ti deka nemu enggau nyentuk pekara/barang/runding ti dikenataika sida. Simpul jaku pandak, sida iya lanchar maya bejaku laban enda teketu sengapa ngasuh orang ti ninga lama nganti.
5) Sida ukai semina landik bejaku aja, tang mega bejaku ngena gaya liuk tubuh (body language) ti berupai bisi meri pengandal/pengarap enggau pekara ti disebut. Sida mega bejaku ngena leka jaku ti dipilih (chosen of words); leka jaku sida mai reti ti besai tau narit ati sereta nyengala ba orang ti ninga. Penginggar chara sida bejaku (tone) nitihka gaya pekara ti dikerandau; ukai semina sigi lebas aja. Sida bejaku enggau mayuh belebas nitihka biuh randau.
6) Sida mai peninga sama bela bejurai dalam randau sida (involve, engage, connect); dia alai randau sida bejalai dalam dua tuju (two-way communication).
Comments
One Response to “Teknik Landik Bejaku”
Leave a Reply
-
Provided by votectdirect.com .
Manah topik tu. Ngagai sapa ke bisi ati deka belajar teknik bejaku tau mega enggau masuk kelab Toastmaster - kelab ti meri latih chara bejaku ba mua mayuh.