Rega Pemakai Makin Niki: Risiko Ekonomi, Politik Sereta Sosial (Part 1)

August 28, 2009 · Filed Under Ekonomi, Politik, Sosial 

Dikarang Ulih Futurist

Risiko Global Bekau Rega Pemakai Ti Balat Mar Niki Sereta Enda Tetap (Volatile)

Mayuh menua udah ngasaika pemerinsa nuntung bala rakyat ketegal rega pemakai ti majak mar sereta niki tiap-tiap taun. Di nengeri Sarawak ti endang kaya dalam ngeluarka asil mayuh bengkah barang pemakai pan kitai bisi udah ninga sekeda rakyat ti diau jauh ari arus pemansang di menua petisir dituntung penusah suntuk pemakai baka ti dipansutka dalam berita - “Church send out SOS over food crisis in Sarawak interior”, berita penuh pasal penusah tu tau dipeda ba ditu:

Pekara Ti Patut Diperundingka Mensia Mayuh Diatu:

1) Rega pamakai: nama kabuah rega pemakai majak mar, kini ke penungga kuing polisi perintah dikena ngaduka penusah mensia mayuh ba menua tu?

2) Nama pangka (impacts) rega pemakai ti majak mar ngagai ekonomi menua tu lebih agi ba nengeri Sarawak ti agi jauh bendar tinggal pemansang? Naka ti diatu, apin bisi statistik nunjukka pangka iya ba ekonomi orang ti diau di menua petisir. Taja pia, kitai bisi macha dalam berita, orang dagang ba menua ulu (chunto: ba mayuh bengkah kem kayu balak) nyual barang pemakai enggau rega ti lebih ari patut laban deka jampat untung (excessive profiteering), tang nadai ngira penusah ti ditapi rakyat kurang penatai pemisi. Di menua Bario, pegai Bahagian Miri mega mensia mayuh bisi ngeransi rega barang kelalu tinggi sereta mar.

3) Nama pangka rega pemakai ti majak mar ngagai politik menua tu lebih agi ba nengeri Sarawak? Bisi tauka nadai risiko iya ngagai pengentap politik di menua tu?

4) Nama pangka rega pemakai ngagai raban orang dagang tauka bisnes? Baka ni jalai orang dagang tau ngurangka pengerugi lalu ngambi penguntung ti patut ari penanggul rega pemakai ti majak mar?

Berita Ngelansa Penusah Kurang Pemakai Suah Ayan Ba Surat Khabar Enggau TV

Rega pemakai udah majak niki dalam berapa taun ti udah lalu, niki manggai ngagai kira 40% dalam taun 2008 belabuh ari taun 2006 (source: FAO). Rega pemakai udah bisi nurun mimit enti dibandingka enggau maya iya pengabis tinggi bekau rega petrol di Malaysia udah ditikika perintah kena 5 Jun 2008 suba. Maya nya, rega petrol ditikika ngenyit ari RM1.92 ngagai RM2.70 seliter. Nya ti ngujungka peratus kadar inflasi Malaysia nambah ngagai kadar ti pengabis tinggi dalam timpuh 27 taun, iya nya 7.7% (Jun, 2008) dibandingka enggau 3.8% (May, 2008).

petrol-prices2

.

Penerang gambar: Setengah puang tauka setengah penuh?: Orang pemeli barang mandingka penyampau minyak ti ulih dibeli ngena duit RM1 kena 4 Jun 2008 enggau 5 Jun 2008 ba sebengkah palan endur bebelika minyak di Kuala Terengganu.

Taja pan rega pemakai udah bisi nurun mimit bekau rega petrol ti udah nurun berenggat, tang structual factors baka atur politik enggau polisi ekonomi perintah meruan dijangka tau ngasuh rega pemakai terus berubah niki enda tentu (volatile).  Penusah tu majak enda tentu udah bekau gaya ekonomi dunya ti enda manah jauh nurun dalam tengan taun 2006 bekau ari pangka global meltdown ti bekait enggau sub-prime mortgages ba menua USA (pos pasal global meltdown enggau sub-prime mortgages deka dipejuraika ba topik baru dudi ila).

Sekeda Ari Kabuah Rega Pemakai Niki, Nyengkaum:

  • Pemansang ekonomi dunya ti majak nambah sereta peminta (demands) raban orang ari middle class majak mayuh ba menua ti benung mansang (emerging markets).

  • Polisi enggau atur ti lubah diaduka ba pengawa ngeluarka barang pemakai dalam sektor betanam betupi (agricultural and aquacultural).

  • Kos barang-barang dikena ngeluarka pemakai (inputs) ti makin tinggi baka petrol enggau baja.

  • Barang-barang pemakai nyau dikena ngaga biodiesel (plant-based oil) baka kelapa sawit enggau ethanol (plant-based alcohol) baka jagung enggau gula. Nya ti ngujungka tanah nyau makin mimit dikena amat betanamka pamakai ti diempa (food crops) laban mayuh tanah udah dikupas dikena napi peminta mensia ti majak nambah begunaka biofuel.

  • Penusah ari ketegal gaya hari, baka kemarau panjai sereta ampuh bah (extreme weather).

Rega Pemakai Ti Mar Beganding Enggau Kos Petrol Ti Makin Tinggi Tau Ngenataika Macham Penanggul:

  • Penanggul Ekonomi - baka penanggul inflasi sereta kuasa polisi fiskal perintah (public treasury) ti enda dipejalaika enggau betul ari ketegal pengawa makai suap (corruptions). Dua pekara tu enti sema nyadi serentak tau mai mayuh penanggul (double-jeopardy dilemma) maya perintah bejalaika polisi - iya nya baka ni deka nulung orang ti lapar pungkang ngena jalai enda nikika kos enggau rega barang? Penanggul tu semina ulih teputar enti rega barang makin nurun sereta nadai penusah makai suap.

  • Penanggul Politik Sereta Pengelikun Menua - sekeda penyarut ti tau nyadi iya nya rakyat deka angkat  ngelaban perintah nengah mayuh chara (protests, riots, demonstration, NGOs) sereta nekan perintah enggau mayuh macham peminta dalam timpuh ti serekat. Ba sekeda menua, penanggul tu ulih mai peluang ti besai (perfect storm) ngagai parti penyakal ngalahka perintah ti ngujungka kuasa politik betukar. Pekara tu udah nyadi maya pengawa bepilih besai Parlimen Malaysia 8 Mar, 2008 suba ti alai perintah BN alah ba 5 bengkah nengeri lalu tampuk kuasa betukar ngagai sida Pakatan Rakyat! Ba menua ti udah ngembuan demokrasi ti udah maju baka USA enggau menua Europa, tu tau ngasuh rakyat majak begedika perintah (anti-incumbent sentiment). Nya ti ngujungka Obama ulih nyadi Presiden menua USA baka kediatu.

  • Rega Saham Kompeni Nurun Niki - mayuh kompeni tau bulih pengerugi ba pasar modal ketegal rega komoditi ti enda tetap. Pasar saham baka KLSE alai bala pelabur beranakka duit tau nurun lalu mai pengerugi ngagai sida. Kompeni ti enda mujur mega dipelabaka deka ngurangka bala kakitangan (laid off) sida dikena napi kos operasi ti majak niki.

Tags: , ,

Comments

4 Responses to “Rega Pemakai Makin Niki: Risiko Ekonomi, Politik Sereta Sosial (Part 1)”

  1. geoffrey on October 14th, 2009 7:45 pm

    Manah blog nuan tu laban ngena jaku Iban. Teruska pengawa nuan tu ngambika bisi nyadika penyanding penemu bala nembiak enggau bala pengajar ke ngambi subjek Bahasa Iban di sekula. Ila aku mantu nabur berita senentang blog tu ngagai bala pengajar Bahasa Iban.

  2. Futurist on October 15th, 2009 11:17 am

    geoffrey,

    Terima kasih laban bisi ngetu ngabas blog MM tu.

    Terima kasih mega ngagai sukung nuan. Pengawa ngemansangka leka jaku Iban enda ulih dirinan siku aja, tang patut dipesaupka bala kitai. Kitai agi jauh bendar enda chukup ari genteran leka jaku lebih agi dikena nerangka penemu ba pengawa bisnes enggau dagang. Arapka kita ti landik ngajar Bahasa Iban mega meri runding enggau penemu dikena semua kitai.

    Aku naka ulih ngasuh penemu ti dipejuraika ditu ulih dibacha mensia mayuh, lalu beduduk ari nya nguji ngena leka jaku ti senang diperagam lalu arapka mayuh agi bala enggau meri penemu sama bejurai ba ditu.

  3. Pala Tekura on October 31st, 2009 5:33 pm

    Baka ba berita pagi tadi dibaca aku ba dalam Borneo Post. Aba taun ti deka datai (2010) rega beras 10 kilo deka ditikika perintah.

  4. Futurist on November 1st, 2009 4:39 pm

    Pala Tekura,

    Nya meh. Munyi ti selalu disebut siku ari kaban ti selalu enggau beforum, rega barang nyau majak niki (inflation = nyau mar), tang rega mata duit tetap sama aja.

Leave a Reply