Juluk Ati Ti “S.M.A.R.T.”
Dikarang Ulih Futurist
Anang Mantul
Bejimat enggau pekara ti selalu diperundingka kitai tiap hari. Maya kitai asai ti putus pengarap sereta mantul neruska juluk ati kitai setengah jalai, mayuh pikir ti negatif selalu bemain dalam runding kitai. Maya tu meh kitai senang bendar deka alah napi penguji ti tau nanggul kitai ari ngulihka juluk ati:
“Aku Ulih”
Selalu kitai ninga jaku munyi tu - enti kitai selalu mikir “enda ulih” lalu enda ulih meh juluk ati ti deka dijapai kitai. Tang enti kitai selalu nanam ba runding kitai din “aku ulih”, besai peluang kitai deka datai ba juluk ati nya tadi. Runding tu sigi udah diungkupka kitai, semina jarang dipejalaika maya ngereja pengawa.
Nama Reti ” S.M.A.R.T ” ?
S = Specific (Nyentuk)
M = Measurable (Ulih disukat/dikira)
A = Achievable (Ulih japai)
R = Realistic (Nyengala)
T = Time Bound (Betimpuh)
Tu siti ari chunto juluk ati:
“ (Engkah nama nuan ditu) deka meli rumah batu apartment/1L/2L/1B/2B kediri empu ba(pilih endur nitihka bajet nuan empu) rega RMxxx(x), xxx.xx maya umur aku manggai 25/30/35 lalu abis dibayar maya umur aku 40/45/50/55.”
Uji peratika semua kereban S.M.A.R.T di atas nya bisi ba dalam juluk ati tu tadi.
1) Juluk ati ti nyentuk (specific) nunjukka kitai jalai ti patut dititih meruan ba dalam ati - iya nya deka meli rumah.
2) Juluk ati kitai mesti ulih disukat/dikira (Measurable) awakka kitai ukai semina nyebut aja ba mulut. Bansa rumah ti dikinginka ati mesti nitihka bajet diri empu. Ari penatai gaji kitai bekereja, dia kitai deka meri ungkup berapa bajet bebayarka lun rumah nya tiap bulan. Dalam pekara tu anang enda bejimat laban bebayarka lun nya tadi ukai sebulan dua aja tang dalam timpuh ti lama.
3) Juluk ati mesti ulih dijapai kitai (Achievable), ukai iya ti enda ulih. Enti gaji bulan semina ulih bajet kena meli rumah 1L(single-storey link house), anang kitai meli 2L(double-storey link house) nunda orang bukai tauka bepekit laban ketegal ti enggai alah. Tang nadai ga salah merambu meli rumah 2L enti nuan bisi penatai mata duit ari asil bukai ti ulih nulung nuan bebayarka bayar bulan.
4) Juluk ati mesti nyengala (Realistic/Reasonable).
5) Juluk ati mesti bisi betimpuh (Time Bound) - di atas nya madah maya umur nuan ulih meli rumah. Enti deka ngaga iya nyentuk agi, tau mega ditambahka kemaia umur belabuh meli sereta kemaya umur abis mayar. Chunto iya baka tu: belabuh meli maya umur 30 lalu abis mayar lun 50 taun.
Semua malin di atas nya nulung kitai pulai fokus baru enggau juluk ati kitai enti kitai asai-asai ta bisi limpang ari tuju asal.
Gaga Rekod/Fail
Manah agi enti ditulis semua juluk ati kitai nya. Anang semina nyebut aja ba mulut enggau randau aja. Gaga life journal kitai empu ngambika kitai ulih meda ni penyauh kitai udah mansang. Diatu senang ulih blogging (blog nuan tau digaga enda dipeda enti enggaika ditemu semua orang). Tang manah agi orang bisi nemu(diri sebilik/kaban) ngambika bisi meri penemu. Kurang-kurang iya enti sema kitai bisi limpang ari tuju asal, agi bisi ga bala kaban belayan meri buah runding ngambi kitai pulai nikal baru bekereja sikal agi.
Comments
3 Responses to “Juluk Ati Ti “S.M.A.R.T.””
Leave a Reply
-
Provided by votectdirect.com .
Manah amai artikel tu. Senang ati macha ia. Landik dalam penulisan bahasa iban. erm…
Futurist,
Nama runding nuan enggau jaku abdul hadi ti madah ‘iban ba Lubok Antu agi becawat enti ari sudut positif ia?
thanx~
rayme,
Terima kasih laban bisi ngetu ditu. Arapka kitai sama bela ngerinan pengawa ngemansangka leka jaku Iban laban agi mayuh bendar kurang ba senentang patah jaku (grammar) dikena kitai nerangka mayuh macham penemu. Arapka S.M.A.R.T. nya ulih nyadika malin ti beguna dalam semua pengawa ti deka dikereja kitai.
Senentang jaku Abdul Hadi nya, aku bisi nulis artikel tang agi ba ‘draft’. Ila aku engkah ba ditu mega.
Terima kasih. Chukup landik nuan bejaku Iban. Bisi maya aku malu kediri, laban enda tentu nemu jaku Iban. Arap ulih meri tunjuk ajar.