Ibanomics (Part 2): Dagang Pemakai
Dikarang Ulih Futurist
Pemakai Asal Tau Nyadika Bisnes
Menua Malaysia lebih agi nengeri Sarawak mayuh diuan pupu raban bansa. Ketegal nya, semua bansa ba nengeri Sarawak bisi ngembuan pemakai asal. Tang mayuh bansa pemakai asal tu enda tentu dipedagangka nyadi bisness ti meruan.
Maya nemuai ngagai menua Korea Selatan suba lebuh ti bejalai ba puak Bandaraya Seoul, aku sempat ngambi gambar di atas nya - KimChi School.
Laban ati ti gagit deka meda enggau mata diri empu, dia alai kami sekaban lalu masuk ngagai endur orang belajar begagaka Kim Chi. Kim Chi tu siti ari bansa pemakai ti tebilang enti maya kitai makai pemakai bansa orang Korea. Palan ba gambar di atas nya semina alai orang nunjukka ngagai bala temuai (tourist) chara orang Korea ngaga Kim Chi. Nyau semua kedai makai Korea bisi ngenahka Kim Chi ba dalam menu pemakai sida. Enti dibandingka enggau pemakai kitai ba menua tau disamaka baka kasam ensabi meh nya, tang meh sida di Korea din tebal agi ngena sayur kubis.
Bisnes Mit Tau Nyadi Besai
Ari gambar di atas nya arapka ulih mai kitai semua berunding. Mayuh amat bansa pemakai asal kitai ba Sarawak ulih pulai nyadika bisnes enti diatur enggau chara ti ngena. Iya ti udah dipeda ngelama tu enda tentu mayuh ti udah bendar mujur, agi ulih ditiap enggau jari. Bisi ga kala meda orang bisnes mansuh ikan keli ba Kuching suba tang udah nya bisnes iya semina idup dalam timpuh dua taun aja.
Maya aku datai baru deka makai ba kedai iya, dipeda udah tutup! Maya ba talipaun aku pan betanyaka kabuah bisnes iya ditutup? Iya pan lalu madah laban mayuh bala orang jai datai minta duit (protection money). Sinu bendar ga aku ninga cherita ari iya.
Mayuh Penguji
Kena ngemunka pengawa bisnes baka tu endang mayuh amat penguji deka datai ngeruga:
1) Orang jai datai minta protection money. Tu dipelabaka bisi mega nyadi ba bisnes bukai.
2) Mesti bepekit enggau bansa bukai ti udah dulu maju ba bisnes. Anang mih alah bulu laban sida.
3) Marketing mesti digaga enggau manah dikena narit orang datai. Ukai semina narit ati sida datai sekali aja, tang ngasuh sida tau datai baru dudi hari ila (repeat customers).
Anang Putus Pengarap
Penguji enggau penusah endang mayuh amat enti kitai ngepunka bisnes kediri empu. Pemansang bisnes bepanggai ba pengeransing ati. Mayuh bendar program ti diatur perintah tauka kompeni dikena mantu dagang ti mit baka tu. Arapka kitai anang malu sereta takut betanya.
Enti bansa orang ulih, bansa kitai pan ulih!
Comments
Leave a Reply
-
Provided by votectdirect.com .