Kabinet: Matematik & Sains Dalam Bahasa Malaysia
Dikarang Ulih Futurist
Kabinet: Bahasa Malaysia
Pekara pasal pemansang sekula tu semak ba dalam ati semua orang. Sari tu kena (8 Julai 2009) kabinet ba parlimen udah baum lalu meri jaku putus sereta netapka mata pelajar Matematik enggau Sains pulai diajar (medium of instruction) ba dalam Bahasa Malaysia baka sebedau taun 2003 suba. Udah suah bendar polisi perintah berubah ba senentang pekara tu! Perintah madah pemutus polisi tu ukai berubah ketegal ari ti kena tekan sekeda parti politik tauka mai tuju politik tang ngerunding pemansang anembiak sekula kediatu sereta dudi hari ila. Sama-sama meh kitai beratika pekara tu enggau silik.
Polisi Baru Deka Dipejalaika Berenggat
1) Bahasa Malaysia deka dikena ngajar mata pelajar Matematik enggau Sains ba semua sekula kebangsaan belabuh ari taun 2012 ila ngagai anembiak taun satu enggau taun empat, sereta ba pom satu enggau pom empat.
2) Ba semua sekula bantuan Cina enggau Tamil mata pelajar dua iti tu deka diajar dalam jaku Cina enggau jaku Tamil belabuh ari taun 2012 ila.
3) Opis Pelajar deka ngemeratka pengelandik bala anembiak ba dalam mata pelajar English taja pan dua mata pelajar tu berubah diajar dalam Bahasa Malaysia.
4) Mata pelajar Kesasteraan English deka diajar maya taun 2012 ila ngambika anembiak ulih nyungkakka pengelandik sida dalam patah jaku (grammar) enggau karang (composition) dalam English.
5) Belajar enggau peresa dua mata pelajar tu deka dipejalaika dalam dua bahasa (English enggau Bahasa Malaysia) nyentukka renggat ti penudi PPSMI abis maya taun 2014 ila.
6) Ubah polisi tu nadai nyengkaum sida anembiak ba pom enam enggau matrikulasi.
7) Bala pengajar English deka ditambahka mayuh agi. Pengajar ti udah pencen mega deka diambi bekereja baru. Pengajar ti landik ngajar English ari menua luar mega engka deka diambi ngajar ba menua tu.
Polisi Selalu Berubah Tang Anembiak Nyadi Tikus Belanda (Guniea Pig)
Polisi pemansang pelajar kelalu balat suah berubah tiap kali Menteri Pelajar betukar. Ngubah polisi nadai salah enti polisi ti baru tau mai pemansang ti enda ngenusahka pemansang runding enggau penemu bala anembiak sekula. Enti sema pengajar ti ngajar Matematik enggau Sains dalam English kurang pengelandik, sida bala pengajar meh ti patut dilatih sereta nyikap diri nyadi landik agi.
Diatu nama penyadi? Bala anembiak ti tusah nyau kalat-kalat ba runding sida. Bala anembiak sekula rebak baru diatu enda nyalah-nyalah disemaka baka tikus belanda (guniea pig) ba makmal sains.
Pekara ti berat balat ngirauka ati mensia mayuh diatu iya nya politik disempulangka dalam polisi pemansang sekula! Pangka ubah pemansang dunya nadai sempadan (globalization) nadai ulih nganti anembiak udah besedia tauka enda. Tumu agi bala anembiak nyikap diri enggau penemu baru ti mayuh dikenataika dalam English manah agi sereta mayuh agi penguntung sida dudi hari ila maya nyambung sekula ba tikas ti tinggi agi. Nyikap diri ngena penemu baru ulih nulung sida mujur agi napi pangku pengawa sida baika bekereja ba orang bukai, bekereja ba perintah, tauka bekereja kediri empu (self-employed / entrepreneur).
Berita dalam surat khabar mega enda tentu sebaka dalam ripot sida ba senentang pekara tu:
1) TheStar Online madah Bahasa Malaysia.
2) Berita Harian madah Bahasa Melayu.
Enti diperatika enggau silik reti Bahasa Malaysia enggau Bahasa Melayu enda sama. Engkeman agi enti ditetapka ari diatu - Bahasa Malaysia!
Sigi amat mih leka jaku sempama ti munyi tu - “sekali air bah, sekali pasir berubah.”
Kuasa Politik Beguna Ari Pemanah Polisi?
Pekara ti ngasuh ngirauka ati diatu - “ukai ba pasal sida ti amat-amat ngaga/ngubah polisi ti betul nguntungka bala anembiak sekula, tang meh sida nyau baka ti ngaga/ngubah polisi semina dikena ngenanka kuasa politik (a view from political lenses as it deems fit for the incumbent to be remained in power).”
Comments
Leave a Reply
-
Provided by votectdirect.com .